सर्लाही । जनता समाजवादी पार्टी, नेपाल सर्लाही निर्वाचन क्षेत्र नं. २ का प्रतिनिधिसभा उम्मेदवार भरत चौधरीले आज कौडेना गाउँपालिका–३ मा आयोजित एकाहा पूजामा सहभागिता जनाएका छन्।
पूजामा सहभागी हुँदै उम्मेदवार चौधरीले सनातन कालदेखि चल्दै आएका धार्मिक तथा सांस्कृतिक परम्पराको संरक्षण आजको आवश्यकता भएको बताएका छन्। उनले मधेशको पहिचान र स्वाभिमान संस्कृतिसँग गहिरो रूपमा जोडिएको उल्लेख गर्दै यस्ता संस्कृतिले भावी पुस्तालाई आफ्नो मौलिक सांस्कृतिक पहिचान चिनाउन महत्वपूर्ण भूमिका खेल्ने बताए।
सो अवसरमा चौधरीले कौडेना गाउँपालिकाका विभिन्न वडामा पुगेर पार्टीका कार्यकर्ता तथा स्थानीय सर्वसाधारणसँग भेटघाट तथा छलफल समेत गरेका छन्। भेटघाटका क्रममा उनले स्थानीय समस्या, जनताको अपेक्षा र आगामी दिनका योजनाबारे सुझाव संकलन गरेको बताइएकाे छ।
